Ballina Aktualitet Çfarë ndodhi mbrëmë në debatin presidencial

Çfarë ndodhi mbrëmë në debatin presidencial

SHPËRNDAJE

Në Seint-Ljuis të Mizurit debati i dytë presidencial Klinton-Tramp u zhvillua në një atmosferë akuzash dhe kundërakuzash të ashpra. Kandidatët, të cilët kur hynë nuk i dhanë dorën njëri-tjetrit si në debatin e parë, u pyetën për shembullin që ata duhet të jepnin për të rinjtë, një pyetje që nënkuptonte komentet vulgare të bëra nga zoti Tramp për gratë 11 vjet më parë dhe që u publikuan të premten.

Kandidati republikan u përpoq t’i shmanget pyetjes, duke ndryshuar temë disa herë. “Ja kush është Donald Tramp”, tha zonja Klinton. Zoti Tramp tha: “Nuk jam krenar (për videon). Shihni Bill Klintonin. Të mijat ishin fjalë, të tijat ishin vepra”. “Kam respekt të madh për gratë; askush nuk i respekton gratë më shumë se unë”, tha zoti Tramp.

Zonja Klinton e kritikoi ashpër rivalin. Ajo tha se nuk ishte vetëm videoja e publikuar të premten që ngre pikëpyetje nëse zoti Tramp duhet të jetë apo jo president, por edhe komentet e tij lidhur me emigrantët, myslimanët dhe çështje të tjera. Zoti Tramp tha se këto janë “vetëm fjalë” që i dëgjojmë prej vitesh. Ai e kritikoi zonjën Klinton për çështje të tjera si arsimi dhe afrikano-amerikanët, përsëri duke u përpjekur t’i shmanget pyetjes së fillimit.

Ai tha se komentet e tij të publikuara të premten ishin thjesht biseda spontane, por Bill Klinton, – tha ai, – ka qenë abuzues i grave dhe zonja Klinton i ka sulmuar këto gra. Zoti Tramp kishte sjellë në sallën e debatit tre nga gratë që e kanë akuzuar zotin Klinton në të kaluarën për sjellje të pahijshme seksuale ndaj tyre.

Kur debati u përqendrua tek emailet e zonjës Klinton, zoti Tramp tha se ai do të emëronte një prokuror të posaçëm për të hetuar rivalen e tij. “Ju do të përfundonit në burg”, tha ai, duke nënkuptuar se ajo kishte shkëmbyer materiale të klasifikuara duke përdorur një server privat, kur ishte sekretare e shtetit.

Zonja Klinton e quajti “të rrezikshme” retorikën e rivalit Tramp për myslimanët. “Vizioni im i Amerikës është një Amerikë ku secili ka një vend”, tha ajo. Zoti Tramp u përgjigj, duke thënë se islamofobia është problem, por shtoi se SHBA kanë një problem serioz. Ai përmendi vrasjet në San Bernardino si shembull të “terrorizmit islamik radikal”.

Të pyetur për rolin e Rusisë në zgjedhjet presidenciale amerikane, zonja Klinton tha se Rusia po përpiqet t’i ndikojë zgjedhjet në favor të zotit Tramp, “ndoshta ngaqë ai e ka lavdëruar Presidentin Putin, ndoshta ngaqë synon të bëjë biznes në Moskë”. Zoti Tramp u përgjigj se ai nuk ka kredi me Rusinë. “Mund të pyesni pranë qeverisë amerikane dhe ata mund t’jua thonë këtë, sepse ata i njohin fare mirë të dhënat e mia financiare”, tha kandidati republikan.

E pyetur lidhur me strategjinë për Sirinë, zonja Klinton tha se ajo nuk do të dërgonte trupa tokësore në Siri, por do të mbante atje forca speciale. I pyetur se cila është strategjia e tij nëse qyteti Alepo bie, zoti Tramp tha se në thelb Aleppja ka rënë. Ai kritikoi ashpër politikën e administratës Obama për Sirinë.

Të pyetur nëse do të jenë presidentë të të gjithë amerikanëve, kandidatët dhanë përgjigje të ndryshme: “Shumë njerëz janë të shqetësuar nëse do të kenë një vend në Amerikën e Donald Trampit”, tha zonja Klinton. “Zonja Klinton ka një urrejtje të madhe në zemrën e saj”, u përgjigj kandidati Tramp. “Ky vend nuk mund të durojë katër vjet të tjera të Barak Obamës dhe kjo do të ndodhë nëse ajo zgjidhet”, tha ai.

Në fund të debatit kandidatët u pyetën: Megjithë retorikën e tanishme, cila është ajo gjë që respektoni te njëri-tjetri? Zonja Clinton tha se respektonte fëmijët e zotit Tramp. Kandidati republikan u përgjigj se Hillari nuk dorëzohet dhe kjo është një veti e mirë. Të dy thanë se nuk ishin dakord me të gjitha gjërat e tjera të njëri-tjetrit.

Kandidatët e përfunduan debatin e ashpër me një shtrëngim duarsh.

Befasia përpara debatit

Kandidati republikan për president Donald Tramp u shfaq para debatit në një konferencë shtypi me një grup grash që kanë akuzuar Presidentin Klinton në të kaluarën për sjellje të pahijshme seksuale ndaj tyre. Me daljen e tij të paparashikuar në një hotel të Seint-Ljuisit, zoti Tramp la të kuptohet se debati i së dielës do të ishte i ashpër.

Debati i dytë presidencial Trump-Clinton u zhvillua pas komenteve fyese për gratë të bëra në vitin 2005 nga zoti Tramp dhe të publikuara të premten nga gazeta “Washington Post”.

Zoti Tramp tha të dielën se nuk ekzistonte “asnjë mundësi” që ai të largohej nga gara për Shtëpinë e Bardhë, një muaj përpara zgjedhjeve që do të mbahen më 8 nëntor. Hillari Klinton vazhdon të përballet me komentet e saj të botuara nga “Wikileaks”, ku tregohet se ajo shpesh përqafon një qëndrim të caktuar në publik, ndërsa privatisht mban një pozicion krejt të kundërt, për çështje të rëndësishme, si tregtia apo marrëdhënia e saj me kompanitë e mëdha të “Wall Street”-it.

Edhe anketimet e bëra përpara këtij publikimi tregojnë se një pjesë e madhe e amerikanëve vënë në pikëpyetje besueshmërinë e saj.

Obama: Trump, “i pasigurt”

Presidenti Barak Obama tha të dielën se Donald Tramp është i “pasigurt” dhe “e pompon veten”, duke denigruar të tjerët. Presidenti Obama i bëri komentet si reagim ndaj gjuhës vulgare të përdorur nga zoti Tramp në vitin 2005, kur u regjistruar në një bisedë spontane duke u mburrur se mund t’i kapte femrat nga gjenitalet, pasi ishte “i famshëm”. Një video me këto komentet e zotit Tramp u publikua nga gazeta “Washington Post” të premten.

Duke bërë fushatë për anëtaren e Kongresit, Tami Dukuorth në shtetin Ilinoi, zoti Obama tha se fjalë të tilla tregojnë se zoti Tramp do të ishte “i pakujdesshëm me qytetarinë dhe respektin” që kërkon një demokraci e gjallë. Edhe pse sondazhet tregojnë se zoti Tramp është prapa kandidates demokrate Hillari Klinton, zoti Obama tha se rëndësia e këtyre zgjedhjeve është e tillë, që asgjë nuk duhet marrë si e garantuar. Ai theksoi se ka rëndësi që mbështetësit e zonjës Klinton të punojnë shumë dhe të dalin në votime më 8 nëntor.

Thirrje kandidatit Tramp të largohet

Një anketë me më shumë se 1500 votues e realizuar nga “Politiko.com” dhe “Morning Consult” pas publikimit të regjistrimit, tregon se rreth 70 për qind e demokratëve, por vetëm 12 për qind e republikanëve, mendojnë se zoti Tramp duhet të largohet nga gara. Disa zyrtarë të zgjedhur republikanë i kanë bërë thirrje zotit Tramp të heqë dorë nga gara për Shtëpinë e Bardhë. Megjithatë, nuk ka pasur konsensus se kush mund ta zëvendësonte zotin Tramp, nëse ai do të dëshironte të largohej.

Ndërkohë, në SHBA ka filluar votimi i hershëm dhe me postë. Vetëm ditët e fundit janë hedhur rreth 400.000 vota. Shtetet në të gjithë vendin kanë shtypur tashmë fletëvotimet me emrat Tramp dhe Pence si kandidatë republikanë; ndërkaq fletët e votimit i janë dërguar personelit të shërbimit ushtarak të stacionuar jashtë vendit.

Republikanët kryesorë, duke përfshirë edhe kandidatin për nënpresident, Guvernatorin e Indianës Mike Pence, i kanë dënuar komentet e vitit 2005 të zotit Tramp.

“Unë nuk i toleroj komentet e tij dhe nuk mund t’i mbroj ato”, tha zoti Pence, i cili anuloi një fjalim të planifikuar fushate të shtunën në Uisconsin, ku pritej të fliste në vend të zotit Tramp.

Senatori i Arizonës, Xhon Mekein, ish-kandidat republikan për president në vitin 2008, tërhoqi mbështetjen e tij për zotin Tramp, por nuk i bëri thirrje të largohet nga gara presidenciale. Edhe ish-guvernatori i shtetit Masaçusets, Mit Romnej, gjithashtu kandidat për president në vitin 2012, dënoi mburrjet seksuale të zotit Tramp.

Gjuha vulgare e përdorur nga zoti Tramp i vuri në vështirësi gazetat dhe mediat amerikane, të cilat nuk ishin të sigurta se si duhej t’i përshkruanin komentet e tij. Disa prej tyre i shtypën fjalët ashtu siç ishin thënë nga Tramp, ndërsa të tjera përdorën eufemizma të ndryshme.

“Zëri i Amerikës”

Loading...