Presidenti i Republikës dekoron shkrimtarin Ismail Kadare

Në 80-vjetorin e lindjes, Presidenti i Republikës, Bujar Nishani, do të dekorojë shkrimtarin e madh Ismail Kadare. Në prezencën e njer...


Në 80-vjetorin e lindjes, Presidenti i Republikës, Bujar Nishani, do të dekorojë shkrimtarin e madh Ismail Kadare. Në prezencën e njerëzve të artit dhe kulturës, Kadare do të nderohet me “Dekorata e flamurit kombëtar”, për kontributin e tij të jashtëzakonshëm për nxjerrjen nga anonimati të letërsisë shqipe, çka e ka bërë që në vitet më të errëta dhe të izoluara, gjatë diktaturës komuniste. Ajo u jepet personaliteteve shqiptare dhe të huaja për merita të jashtëzakonshme për lartësimin e shtetit dhe të kombit shqiptar.
I nderuar me shumë çmime letrare ndërkombëtare nga Spanja në Jerusalem, kishte ardhur momenti që Kadare të nderohej me dekoratën më të lartë të shtetit shqiptar.
Sipas një njoftimi të Akademisë së Shkencave, ceremonia e dorëzimit do të mbahet ditën e premte, në Hotel Tirana, ku Presidenti Nishani do të mbajë fjalën e rastit.
Bashkangjitur kësaj ngjarjeje, parashikuar brenda Vitit kushtuar një prej figurave më të rëndësishme të kulturës shqiptare, Akademia e Shkencave e Shqipërisë, anëtar i së cilës është shkrimtari i madh, Akademia e Shkencave dhe e Arteve e Kosovës, në bashkëpunim me Bashkinë e qytetit Gjirokastër dhe Universitetin e Gjirokastrës “Eqrem Çabej”, organizojnë konferencën shkencore ndërkombëtare “Shekulli i Kadaresë”.

Konferenca i nis punimet në Tiranë për t’i përfunduar në qytetin e lindjes së shkrimtarit, në Gjirokastër, në shtëpinë-muze me emrin e tij. Do të marrin pjesë në këtë aktivitet dyditor akademikë, studiues e përkthyes të veprës së Kadaresë nga Shqipëria, Kosova, Maqedonia, Italia, Rumania, Franca etj. Në ditën e parë të konferencës do të përshëndesin krerët e akademive shqiptare në tri shtete: Myzafer Korkuti, Ali Aliu e Luan Starova.
Nga arbëreshët e Italisë do të jetë akademiku Francesco Altimari, ndërsa do të kumtojnë Ak. Floresha Dado e prof. Shaban Sinani mbi “Shekulli i Kadaresë”; Ak. Mehmet Kraja do të kumtojë mbi raportin e shkrimtarit me Kosovën dhe për Kosovën: “Kadare dhe Kosova”; prof. Bashkim Kuçuku për përkthimin e veprës së shkrimtarit në gjithë botën: “Kadare në gjuhët e popujve”.
Do të jenë të pranishëm gjithashtu prof. Ardian Ndreca, prof. Éric Faye, prof. Peter Morgan, prof. Giuseppina Turano, Marius Dobrescu, të cilët kanë rezervuar një bashkëbisedim mbi përkthimin dhe studimin e veprave të Kadaresë në gjuhë të huaj, nën modelimin e studiuesit Matteo Mandala. Po ashtu, do të bëhet edhe një paraqitje rezultatesh të studimeve dhe botimeve më të fundme për veprën e I. Kadaresë; projektesh studimore dhe përvojash në përkthim; pyetje dhe diskutim i lirë midis studiuesve dhe përkthyesve të veprës së Kadaresë.

Related

Kultura 4264585169057497469

Arkivi

Kontakt

Name

Email *

Message *

STUDJESA PETROL

item